Kwa mujibu wa ripoti ya Idara ya Kimataifa ya Shirika la Habari la Hawza, wanazuoni na wanafunzi wa elimu ya Kiislamu wa Jamhuri ya Azerbaijan wanaoishi nchini Iran wametoa tamko rasmi la kulaani matukio ya kigaidi ya hivi karibuni pamoja na kuvunjiwa heshima matakatifu ya Kiislamu. Katika tamko hilo, wametoa pole zao kwa Kiongozi Mkuu wa Mapinduzi, Maraji' wakuu wa taqlid, na wananchi wote wema wa Jamhuri ya Kiislamu ya Iran; wameeleza chuki yao ya dhati dhidi ya uhalifu huo, na wakasisitiza umuhimu wa kulinda umoja na kuwa macho kwa ujumla dhidi ya njama za adui. Wanazuoni na wanafunzi hao pia wametaka zichukuliwe hatua kali dhidi ya vibaraka wa Kizayuni–Marekani walio nyuma ya njama hizi chafu.
Matini kamili ya tamko hilo ni kama ifuatavyo:
Kwa Jina la Mwenyezi Mungu, Mwingi wa Rehema, Mwenye Kurehemu
“Wanataka kuizima nuru ya Mwenyezi Mungu kwa vinywa vyao, lakini Mwenyezi Mungu atatimiza nuru Yake, hata kama makafiri watachukia.”
Kwa huzuni kubwa kufuatia matukio ya kigaidi ya hivi karibuni katika dola takatifu ya Kiislamu, ambayo yanahesabiwa kuwa sehemu ya njama chafu za Kizayuni–Marekani, tunatoa pole zetu kwa Kiongozi Mkuu wa Mapinduzi, Maraji' wakuu, wanazuoni, na wananchi wote wa Jamhuri ya Kiislamu ya Iran, na tunadhihirisha chuki yetu ya dhati dhidi ya uhalifu huu.
Picha za kuidharau Qur’ani Tukufu, misikiti na vituo vya kidini—ambavyo ni alama za imani na maadili yetu matukufu — zinaumiza moyo wa kila Muumini na kuchochea hasira yake.
Sisi, wanafunzi na wanazuoni wa dini wa Jamhuri ya Azerbaijan, kwa kurejea Aya za Wahyi na mafundisho ya Mtume Mtukufu wa Mwenyezi Mungu (rehema na amani ziwe juu yake na Ahlul-Bayt wake) tunalaani vikali kitendo chochote kinachosababisha kuvunjiwa heshima kwa matakatifu, kuleta machafuko na kudhoofisha umoja wa Kiislamu. Matukio haya ni matokeo ya mipango chafu ya maadui wa Uislamu na Mapinduzi, wanaolenga kuyumbisha uthabiti na usalama wa nchi inayotawaliwa kwa misingi ya mafundisho ya dini.
Huku tukisisitiza umuhimu wa kudumisha utulivu na uangalifu wa jamii kwa ujumla, tunawaomba kwa dhati viongozi waheshimiwa wa Jamhuri ya Kiislamu ya Iran, kwa azma thabiti na kwa kutegemea nguvu pamoja na imani kwa Mwenyezi Mungu Mtukufu, wawabaini wahusika wakuu wa njama hizi na wachukue dhidi yao hatua za kisheria na kali. Aidha, tunasisitiza umuhimu wa kuimarisha umoja na mshikamano ili kukabiliana na hila za maadui wa Uislamu.
Tunamuomba Mwenyezi Mungu wa Haki awateremshie rehema mashahidi, awaponye haraka majeruhi, na ailinde Iran kwa heshima, nguvu na kuinuliwa.
Wanazuoni na wanafunzi wa elimu ya Kiislamu wa Jamhuri ya Azerbaijan wanaoishi katika Jamhuri ya Kiislamu ya Iran
Maoni yako